Archive for the 'School Events' Category

Wasal Ġunju u miegħu jġib in-nofstanhari u l-bidu tal-istaġun tas-sajf.  Issa bdiet is-sħana, ħafna sigħat ta’ dawl u aktar ħajja u attivitajiet li jsiru barra.  Waslu wkoll l-eżamijiet annwali li fihom irridu nuru li matul is-sena skolastika aħna tgħallimna ħafna affarijiet sbieħ li jiswew għall-ħajja.  Iż-żmien itir u ma jistenna lil ħadd u wasalna fl-aħħar xahar tas-sena skolastika.  Dan huwa xahar li miegħu jġib bosta festi u ċelebrazzjonijiet sbieħ.  Fl-iskola jkollna l-Ewwel Tqarbina tat-tfal li jkunu għamlu l-Preċett fil-Parroċċi tagħhom.  Kemm ikunu sbieħ kollha lebsin bl-abjad sabiex juru l-indafa tal-qlub tagħhom hekk kif jirċievu l-Ewkaristija għall-ewwel darba fl-iskola! 

Ikollna wkoll festi bħal dik tal-Qalb ta’ Ġesu’ u ta’ San Pietru u San Pawl – popolarment magħrufa bħala l-Imnarja.  Ikollna wkoll il-festa nazzjonali tas-Sette Giugno fis-7 ta’ Ġunju.  Matul dan ix-xahar jiġi wkoll Jum il-Missier. Fl-aħħar tax-xahar nsellmu lill-iskola u nibdew bil-vaganzi tas-sajf – żmien ta’ sħana kbira, għawm, ilbies ħafif u ikel li jfakkarna fl-istaġun sajfi: bħal xi ġelat tajjeb jew xi felli dulliegħa friska!

Wasal ix-xahar ta’ Mejju – ix-xahar tal-Madonna!  Mejju huwa l-ħames xahar tas-sena u jkollu 31 jum.  Mejju huwa xahar mill-isbaħ!  Fih ikollna bosta festi sbieħ.  Jibda bil-festa ta’ San Ġużepp Ħaddiem; ikollna l-festa ta’ San Ġorġ Preca u l-festa tal-Visitazzjoni tal-Madonna.  Matuldan ix-xahar ikollna wkoll Jum l-Omm.  Fl-iskola jkollna l-inkurunazzjoni tal-Madonna fejn inpoġġu kuruna bil-fjuri fuq ras l-istatwa tal-Madonna sabiex nuruha kemm inħobbuha u li rriduha tkun ir-reġina ta’ qalbna.

Issa nibdew inħossu xi ftit tas-sħana għax l-istaġun tas-sajf qiegħed joqrob ġmielu!  Jibda jdum ma jidlam u nkunu nistgħu nagħmlu aktar affarijiet mis-soltu għax ikollna aktar ħin ta’ dawl.

Marzu huwa wieħed mix-xhur l-aktar sbieħ tas-sena – u dan għal bosta raġunijiet.  Marzu huwa x-xahar li matulu tispiċċa x-xitwa u tirritorna r-rebbiegħa!  Il-ħajja terġa’ tibda tieħu r-ruħ mill-ġdid – jibda jkollna aktar dawl, jinbtu l-fjuri u s-siġar jerġgħu jilbsu b’weraq ġodda u friski u s-siġar tal-frott jimtlew biż-żahar.  L-annimali wkoll jibda jkollhom il-frieħ! Ir-rebbiegħa hija staġun sabiħ ħafna u li jerġa’ jnissel fina tamiet ġodda.  Marzu jissejjaħ ix-xahar ta’ San Ġużepp għax fid-19 tax-xahar issir il-festa ta’ dan il-qaddis tant kbir u importanti! San Ġużepp kien il-bniedem li minn għandu Ġesu’ kiseb ħafna tagħlim u għerf.  Mhux biss kien ir-raġel li dejjem ħa ħsiebu imma kien ukoll qisu l-għalliem tiegħu.  Fil-25 issir il-festa ta’ meta l-Anġlu Gabrijel mar għand Marija u ħabbrilha li hi kellha tkun l-omm ta’ Ġesu’.

F’Marzu wkoll ikollna bosta tifkiriet sbieħ li jfakkruna fl-aħħar ġranet ta’ Ġesu’ – ikollna l-festi sbieħ tal-Madonna tad-Duluri, ta’ Ħadd il-Palm, ta’ Ħamis ix-Xirka, tal-Ġimgħa l-Kbira u tal-Għid il-Kbir.  Dawn huma l-aktar festi importanti għall-insara għax matulhom Ġesu’ wera li hu mhux biss bniedem imma Alla wkoll.

Fl-aħħar jum ta’ Marzu nfakkru waħda mill-festi nazzjonali ta’ pajjiżna – Jum il-Ħelsien.  Din tfakkarna meta kienet telqet il-bażi Ingliża minn Malta.

	xxxx
San Ġużepp		Id-Duluri